ეტლი
ეტლი ერთ-ერთი ყველაზე ძლიერი საჭადრაკო ფიგურაა! თუ გსურს, რომ უკეთესი მოთამაშე გახდე, მისი სათანადოდ გამოყენება უნდა ისწავლო.აი, ყველაფერი ის, რაც ეტლის შესახებ უნდა ვიცოდეთ:
რომელი ფიგურაა ეტლი?
ეტლები დაფის კუთხეებში - a1, a8, h1 და h8 უჯრებზე განლაგებული ფიგურებია. თამაშის დასაწყისში თითოეულ მოჭადრაკეს ორი ეტლი ჰყავს.
საჭადრაკო არმიის წევრებს შორის ეტლი ერთ-ერთი საუკეთესოა, ამიტომ ის მთავარ ფიგურებში შედის. ეტლს მინიჭებული აქვს ხუთი ქულა, ანუ ორით მეტი ვიდრე მხედარს და კუს. ერთადერთი ფიგურა, რომელიც მას ღირებულებით აღემატება, ლაზიერია.
ეტლის მოძრაობის წესები
ეტლის მოძრაობის წესები მისი სიძლიერის მთავარი განმსაზღვრელია. ის დადის ზემოთ, ქვემოთ, მარჯვნივ და მარცხნივ ნებისმიერ მანძილზე.
თუ ეტლის მოძრაობის წესები დაგვავიწყდება, შეგვიძლია პლუსის სიმბოლო (+) გავიხსენოთ ხოლმე.
მხედრისგან განსხვავებით, ეტლს ფიგურებზე გადახტომა არ შეუძლია. შესაბამისად, თავისუფალი მოძრაობისთვის მას ღია ხაზები სჭირდება.
ეტლის შამათები
ეტლის ძლიერების კიდევ ერთი მიზეზი ისაა, რომ მას სამი გავრცელებული ტიპის შამათის ჩასმა შეუძლია.
ერთ-ერთი შამათი ე.წ. ეტლების როკვის ტექნიკის გამოყენებით ისმევა. მას ბალახის მთიბავ შამათსაც ეძახიან. მის განსახორციელებლად ეტლები "ცეკვა-ცეკვით" მიიწევენ დაფის მეორე ბოლოსკენ და მოწინააღმდეგის მეფეს ნელ-ნელა ავიწროებენ.
მეტოქის დაშამათება ერთი ეტლითაც შესაძლებელია. თუკი მოწინააღმდეგის პაიკები თავიანთი განლაგებით როქირებულ მეფეს ბლოკავენ, ჩვენ შეგვიძლია ჩავსვათ შამათი ბოლო ჰორიზონტალზე. ამგვარი პოზიციით ყოველთვის უნდა ვისარგებლოთ, ოპონენტს ეტლით თავს უნდა დავესხათ და პარტია გამარჯვებით დავასრულოთ.
და ბოლოს, არსებობს კიდევ ერთი ტიპის შამათი ეტლით, რომლის დროსაც სულაც არ ვართ დამოკიდებულები მეტოქის პაიკების განლაგებაზე. თუ ეტლს საკუთარი მეფე მხარში ამოუდგება, მოსაგებად სხვა აღარაფერი დასჭირდება.
ბოლოთქმა
შენ უკვე იცი თუ რომელი ფიგურაა ეტლი, რამდენი ქულა აქვს მას მინიჭებული, როგორ მოძრაობს ის და როგორ აშამათებს მეტოქეს. ახლა გადადი გაკვეთილების გვერდზე, რათა სხვა ფიგურებიც შეისწავლო და ჭადრაკის გენიოსი გახდე!