ჭადრაკის დაფა
თუ მეგობრებთან ერთად ჭადრაკის თამაშს გეგმავთ, მაშინ მოქმედების ადგილი - ჭადრაკის დაფა კარგად უნდა შეისწავლოთ! გავიგოთ, კონკრეტულად რისი ცოდნაა საჭირო.- რა არის ჭადრაკის დაფა?
- რა ნაწილებისგან შედგება ჭადრაკის დაფა?
- როგორ უნდა დავალაგოთ ფიგურები დაფაზე?
- ბოლოთქმა
- ვიდეო ჭადრაკის დაფაზე
რა არის ჭადრაკის დაფა?
ჭადრაკის დაფა ის ადგილია, სადაც პარტიის სათამაშოდ ფიგურებს ვაწყობთ. ის შედგება ერთი ზომის 64 უჯრისგან, რომელთა ფერებიც განსხვავებულია - თეთრი და შავი.
რა ნაწილებისგან შედგება ჭადრაკის დაფა?
ჭადრაკის დაფა, ისევე, როგორც თქვენი სხეული, სხვადასხვა ნაწილისგან შედგება. მართალია მას არ აქვს ხელები და ფეხები, მაგრამ აქვს ჰორიზონტალები და ვერტიკალები.
ვერტიკალი არის უჯრების მწკრივი საჭადრაკო დაფაზე, რომელიც ქვემოდან ზემოთ ადის ან ზემოდან ქვემოთ ჩამოდის.
საჭადრაკო დაფაზე რვა ვერტიკალია. თითოეულ მათგანს თავისი სახელი აქვს (ისევე, როგორც ყველა თქვენს მეგობარს). თანმიმდევრობით მარცხნიდან მარჯვნივ მათი სახელებია: a, b, c, d, e, f, g, h.
ჰორიზონტალი არის უჯრების მწკრივი საჭადრაკო დაფაზე, რომელიც მარცხნიდან მარჯვნივ მიდის ან მარჯვნიდან მარცხნივ მოდის.
ჰორიზონტალები დანომრილია თანმიმდევრობით ქვემოდან ზემოთ. ნუმერაცია ასეთია: პირველი, მეორე, მესამე, მეოთხე, მეხუთე, მეექვსე, მეშვიდე და მერვე.
ახლა, როცა ვერტიკალების დასახელებები და ჰორიზონტალების ნომრები იცით, თითოეული უჯრის სახელსაც ადვილად გაარკვევთ. ამისთვის მარტივი ხერხი არსებობს, შესაბამისად, 64 კვადრატის მისამართის სათითაოდ დამახსოვრება არ მოგიწევთ.
ყოველი უჯრის დასახელება ორი ნაწილისგან შედგება. პირველი ნაწილი იმ ვერტიკალის ასოა, რომელზეც ეს უჯრა მდებარეობს. მეორე ნაწილი იმ ჰორიზონტალის ნომერია, რომელზეც ეს უჯრა მდებარეობს.
ქვემოთ მოცემულ დაფას შეხედეთ. ხომ ადვილია გაწითლებული უჯრის სახელის გამოცნობა?
ამ კვადრატის დასახელების პირველი ნაწილია e, მეორე ნაწილი კი - 4. ე.ი. ეს უჯრა არის e4!
როგორ უნდა დავალაგოთ ფიგურები დაფაზე?
საჭადრაკო დაფის შესახებ უკვე ყველაფერი ვიცით. ახლა გავიგოთ თუ როგორ უნდა დავალაგოთ მასზე ფიგურები. სანამ დავიწყებთ, ერთი მნიშვნელოვანი რამ დაიმახსოვრე: მარჯვენა ქვედა კუთხის უჯრა აუცილებლად თეთრი უნდა იყოს.
როცა დავრწმუნდებით, რომ დაფა სწორად გვიდევს, პაიკების დალაგება უნდა დავიწყოთ. პაიკები დანარჩენი ფიგურების წინ მწკრივდებიან.
შემდეგ დაფის თითოეულ კუთხეში ეტლები უნდა განვათავსოთ.
ეტლებს გვერდზე მხედრები მივუწყოთ.
ახლა კუების შემოყვანის დროა.
მეფე-დედოფლის ჯერიც მოვიდა. ჯერ ლაზიერი შემოდის და თავისივე ფერის უჯრაზე დგება. ამ წესის ადვილად დასამახსოვრებლად, გონებაში ჩავიბეჭდოთ, რომ დედოფლის კაბა და ფეხსაცმელი ერთმანეთს უნდა შევუხამოთ. თუ ლაზიერს შავი კაბა აცვია, ფეხზეც შავი უნდა ჩაიცვას. თუ ის თეთრი კაბითაა შემოსილი, ფეხსაცმელიც თეთრი უნდა ჰქონდეს.
ლაზიერის გვერდით, დარჩენილ თავისუფალ უჯრაზე, მეფე დგება.
ფიგურები დაწყობილია! ე.ი. მეგობრებთან ერთად მხიარულების დაწყების დროა. სხვათა შორის, თუ თქვენს მეგობრებს ChessKid.com-ზე მოიწვევთ, ფიგურების დალაგებაზე ფიქრი არ მოგიწევთ, რადგან ჩვენ გაშლილ დაფას დაგახვედრებთ!
ბოლოთქმა
ჩვენ უკვე ვიცით თუ რა არის ჭადრაკის დაფა და როგორ უნდა დავალაგოთ მასზე ფიგურები. გავიგეთ ჰორიზონტალების, ვერტიკალების და უჯრების დასახელებებიც. ახლა გადადით ჩვენი ვებ-საიტის გვერდზე - ხედვა და საჭადრაკო დაფის უჯრების ამოცნობაში ივარჯიშეთ.